ខេត្តកែប៖ នារសៀលថ្ងៃអង្គារ ទី៦ ខែឧសភា ឆ្នាំ២០២៥ ឯកឧត្តម ឧត្តមសេនីយ៍ឯក ទិត សារ៉ាត់ អគ្គនាយករង នៃអគ្គនាយកដ្ឋានសវនកម្មផ្ទៃក្នុង តំណាងឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ បានអញ្ជើញជាអធិបតី ក្នុងពិធីបើកសវនកម្មផ្ទៃក្នុងសម្រាប់ការិយបរិច្ឆេទ ២០២៤ និងបណ្តាឆ្នាំពាក់ព័ន្ធ នៅសាលប្រជុំធំ នៃស្នងការដ្ឋាននគរបាលខេត្តកែប។
ពិធីខាងលើក៏មានការអញ្ជើញចូលរួមពីគណៈប្រតិភូអមដំណើរ លោកឧត្តមសេនីយ៍ទោ ស្នងការនគរបាលខេត្ត លោក លោកស្រីស្នងការរង នាយ-នាយរងការិយាល័យជំនាញ អធិការ អធិការរងនគរបាលក្រុង ស្រុក និងប៉ុស្តិ៍រដ្ឋបាលទាំង៥ សរុបចំនួន ១៣៩នាក់។
បន្ទាប់ពីគោរពទង់ជាតិបើកកម្មពិធី លោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្ត បានឡើងធ្វើរបាយការណ៍ស្វាគមន៍ អំពីសភាពការណ៍ សន្តិសុខ សណ្តាប់ធ្នាប់សាធារណៈក្នុងខេត្ត រចនាសម័្ពន្ធរបស់កងកម្លាំងនគរបាលខេត្តកែប។
ថ្លែងទៅកាន់អង្គពិធី ឯកឧត្តម ឧត្តមសេនីយ៍ឯក ទិត សារ៉ាត់ អគ្គនាយករងសវនកម្មផ្ទៃក្នុង បានឯកភាពលើរបាយការណ៍របស់លោកឧត្តមសេនីយ៍ទោ ស្នងការនគរបាលខេត្ត និងបានកោតសរសើរចំពោះសមិទ្ធផលការងារដែលសម្រេចបានកន្លងមក ពិសេសការងាររក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម។ ទន្ទឹមនេះ ឯកឧត្តម ក៏បានមានប្រសាសន៍លើការងារបើកសវនកម្មផ្ទៃក្នុងសម្រាប់ការិយបរិច្ឆេទ ២០២៤ និងបណ្ដាឆ្នាំពាក់ព័ន្ធ គឺដើម្បីត្រួតពិនិត្យ វាយតម្លៃលើវឌ្ឍនភាពការងារ ការកែលម្អរាល់ចំណុចខ្វះខាតមួយចំនួនក្នុងបណ្តាឆ្នាំពាក់ព័ន្ធ ការពិនិត្យទៅលើការគ្រប់គ្រងធនធានមនុស្ស ការគ្រប់គ្រងហិរញ្ញវត្ថុ ការគ្រប់គ្រងទ្រព្យសម្បត្តិរដ្ឋ(ចលនទ្រព្យ និងអចលនទ្រព្យ) ពិនិត្យលើការគ្រប់គ្រងបញ្ជីវត្តមាន ព្រមទាំងការត្រួតពិនិត្យលើកញ្ចប់ថវិកាភូមិឃុំមានសុវត្ថិភាព និងពិនិត្យលើប្រព័ន្ធលើកទឹកចិត្តរបស់មន្ត្រីកងកម្លាំងផងដែរ។
បន្ថែមពីនេះឯកឧត្តម បានថ្លែងអំណរគុណនិងជឿជាក់លើការរួមសហការធ្វើសវនកម្មឆ្នាំ២០២៤ សំរាប់ស្នងការដ្ឋាននគរបាលខេត្តកែប បានជោគជ័យតាមការរំពឹងទុក៕
ប្រភព៖ ស្នងការដ្ឋាននគរបាលខេត្តកែប
